O CONCELLO DE NIGRÁN CELEBRA UN PLENO INFANTIL E XUVENIL PARA CONMEMORAR O DÍA MUNDIAL DO MEDIO AMBIENTE

    O Concello de Nigrán acolleu o pasado venres día 7 de xuño un pleno infantil e xuvenil protagonizado por representantes de todos os centros educativos do municipio. A temática da sesión foi o coidado do medio ambiente, tal e como previamente se decidira no Consello de Participación Infantil e Xuvenil do Concello de Nigrán ao coincidir ademáis coa semana do día mundial do Medio Ambiente. Os voceiros de cadanseu centro expuxeron as súas preocupacións e propostas ante o alcalde, Juan González, e a concelleira de Educación, Estela Pérez.

    As peticións da rapazada centráronse na promoción da reciclaxe e compostaxe en cada colexio, aspecto que o propio alcalde se comprometeu a incluír desde o vindeiro curso. Ademáis, mostráronse preocupados polo aumento de poboación durante o verán e as implicacións que iso conleva: desde un aumento do lixo a problemas de aparcamento ou suciedade nos baños da praia, polo que apelaron á responsabilidade individual de cada un para coidar a nosa contorna. A mobilidade en bicicleta foi outra das cuestións abordadas, polo que o propio alcalde lles explicou o Plan Vía-Bici do Concello para facer camiños seguros cara o centro urbano, os colexios ou a praia.

    A edil de Educación, Estela Pérez, explicou aos asistentes ao pleno que todos poden sumarse ao grupo de participación infantil e xuvenil do Concello de Nigrán e, nese sentido, aproveitou a ocasión para despedir a Martín Rey, voceiro do IES Val Miñor e membro do Consello de Participación Infantil por cumplir este ano a maioría de idade.

    

Moitísimas grazas a todos por participar!!

XERACIÓN XA!

 

O GRUPO DE PARTICIPACIÓN INFANTIL E XUVENIL ESCOLLE O NOME E CREA O SEU PROPIO LOGO. O NOME ESCOLLIDO FOI: XERACIÓN XA! 

Á SÚA VEZ FIXERON UN LOGO CUN DESEÑO SINXELO E CLARO OPTANDO POR SEGUIR AS CORES DA CORPORACIÓN MUNIPAL PARA QUE SE LLES IDENTIFIQUE MÁIS FACILMENTE.

As nenas, nenos e adolescentes de Nigrán que forman parte do grupo de participación infantil e xuvenil, despois de moitas deliberacións e propostas chegaron ao acordo de que o nome que máis lles representa e co que se senten máis cómodas e cómodos é XERACIÓN XA! A proposta parte dun dos integrantes máis maiores, Martín, quen ademáis forma parte do CAIA, o grupo autonómico de participación infantil e xuvenil de Galicia.

A idea ocorreúselle como forma de reapropiación do concepto de seren a xeración da inmediatez. De querelo todo xa. Pero tamén como anuncio de que as nenas, nenos e adolescentes están aquí para colaborar co goberno local e construír un lugar máis amigable para a infancia e a adolescencia de Nigrán.

Agardamos que vos guste e que sigades ben de cerca a súa traxectoria.

A VOZ DO CONCELLO DE NIGRÁN FAISE OÍR NO CONGRESO DOS DEPUTADOS GRAZAS A CAYETANA GUEDE

O Concello de Nigrán estivo presente no acto 'Infancia en el Congreso' grazas a Cayetana Guede, alumna de 1º da ESO do IES Val Miñor e integrante do Consello Escolar Municipal.

Cayetana intervíu no Congreso xunto a outras 7 crianzas de todo o país que actuaron como voceiras neste acto organizado cada ano pola 'Plataforma Infancia' á que pertence Unicef e que xirou en torno ao dereito á participación infantil. P

 A maiores, Cayetana forma parte do grupo Asesor de Participación Unicef-España tras ser aceptadas a súa candidatura e a de Martín Rey Álvarez, tamén alumno do IES Val Miñor (este grupo de traballo está composto por 57 nenos e nenas de toda España, sendo 4 deles galegos).

Neste enlace pódese ver a intervención, moitas grazas Caye!!

O CONCELLO DE NIGRÁN ENTRA NO GRUPO ASESOR DE UNICEF-ESPAÑA

        O Concello de Nigrán conta desde este mes de abril con dous representantes no Grupo Asesor de Participación Unicef-España tras ser aceptadas as candidaturas de Martín Rey Álvarez e Cayetana Guede Bernárdez, alumnos ambos do IES Val Miñor e integrantes do Consello Escolar Municipal desde a súa orixe. Este logro destaca o talento de ámbolos dous, estudantes de excelencia, con gran compromiso social, e que xa falaran ante o Parlamento galego con motivo do Día Mundial da Infancia. Xunto a 3 representantes máis de Moaña, Ponteares e Teo, levarán a voz de Galicia a este grupo de traballo composto por 57 nenos e nenas de toda España. 

        Un dos requerimentos para formar parte deste grupo asesor ao que Cayetana (1º da ESO) e Martín (2º de Bacharelato) presentaron a súa candidatura era ter un mínimo de 12 anos e 2 anos de experiencia no eido da participación infantil. Agora, co seu traballo búscase asegurar que as voces, ideas e propostas dos nenos, nenas e adolescentes sexan escoitadas e tidas en conta no Congreso dos Deputados, Parlamentos, elaboración de leis e noutros espazos... Ademais, en colaboración estreita con UNICEF España, confeccionarán e avaliarán as actividades e programas da organización de cara a que reflictan as necesidades, inquedanzas e aspiracións da infancia e adolescencia a nivel nacional. Para elo, este grupo reunirase online unha vez ao mes.

RENOVACIÓN DO CONSELLO MUNICIPAL DA INFANCIA DE NIGRÁN

O Concello de Nigrán estreou o 29 de febreiro un Consello Municipal da Infancia renovado tras elixir o alumnado dos centros educativos do municipio a cadanseu voceiro para os vindeiros dous anos. A concelleira de Educación, Estela Pérez Pérez, xunto á concelleira de Igualdade, Patricia Diego, e o alcalde de Nigrán, Juan González, deron a benvida no Salón de Plenos as novas nenas, nenos e adolescentes que se sumarán ao grupo (14 en total dos que repiten 2). 

Este primeiro encontro servíu para que se coñecesen entre eles e explicarlles polo míudo o seu traballo, que se visibilizará moi próximamente no pleno infantil anual. As reunións do Consello terán lugar cada 15 días e terán como obxectivo que a xente nova do Concello poida participar activamente na vida pública, ofrecendo a súas visións, inquedanzas e propostas ao goberno local para que as cuestións que lles afectan, respondan as súas verdadeiras necesidades e facendo cumplir deste xeito o seu dereito a ser escoitados e tidos en conta.

XI Foro Infantil Unicef - PARLAMENTO DE GALICIA

    Un grupo de representantes do Consello de Participación Infantil e Xuvenil do Concello de Nigrán acudíu un ano máis ao Parlamento Galego no marco do XI Foro de Participación Infantil xunto a rapazada dunha ducia de municipios de toda a Comunidade.

    No marco do Día Mundial da Infancia e da Convención dos Dereitos do Neno, a rapazada de Nigrán participou un ano máis no ‘XI Foro Infantil Unicef’ celebrado no Parlamento de Galicia. Nunha sesión plenaria protagonizada por representantes de Consellos de Participación Infantil e Xuvenil de 12 municipios de toda Galicia, a rapazada reflexionou sobre a protección e a prevención da violencia. 

    Por parte de Nigrán acudiron 9 nenos e nenas membros do Consellos de Participación Infantil e Xuvenil acompañados do rexedor e a edil de Educación, Estela Pérez, actuando Martín Rey (IES Val Miñor) como voceiro. El foi o encargado de expor as vivencias do 'III Encontro Galego de Consellos Locais de Participación Infantil e Adolescente' celebrado o 18 e 19 de novembro na Residencia de Tempo Libre de Carballiño. Ali, coa axuda do ilustrador Leandro Lamas, realizaron un cuadro colaborativo co que agasallaron ao Parlamento.

O CONCELLO DE NIGRÁN PARTICIPOU EN CARBALLIÑO NUN ENCONTRO GALEGO DE CONSELLOS DE PARTICIPACIÓN INFANTIL E ADOLESCENTE

    O Concello de Nigrán estivo presente a pasada fin de semana no Carballiño no 'III Encontro Galego de Consellos Locais de Participación Infantil e Adolescente'. Estela Pérez, a nova edil de Educación, acudiu con 4 dos 14 representantes do Consello de Participación Infantil e Xuvenil de Nigrán, en concreto, con Carmen Vázquez Molares e Marcos Soto García (CEIP Humberto Juanes) e Martín Rey Álvarez e Cayetana Guede Bernárdez (IES Val Miñor) para participar en dúas xornadas de convivencia previas á celebración do 'Día Mundial da Infancia'.

    Durante os dous días na Residencia de Ocio e Tempo Libre desta localidade ourensana elaboraron xunto a outros 50 nenos e nenas de toda Galicia o manifesto que lerán no Parlamento galego o día 28 de Novembro, encadrado na celebración do Día Mundial da Infancia do vindeiro luns 20. Ademais, participaron en actividades lúdicas e educativas entre as que destaca o obradoiro do ilustrador Leandro Lamas no que realizaron un cadro colaborativo no que plasma os dereitos máis importantes da infancia.