A MESA DE COORDINACIÓN INTERNA DE NIGRÁN REÚNESE PARA POÑER EN COMÚN OS AVANCES DO PLAN MUNICIPAL

    A Mesa de Coordinación Interna de Nigrán volveu reunirse para poñer en común os avances na execución do Plan Municipal de Infancia e Adolescencia e continuar avanzando no compromiso do Concello coa mellora das políticas destinadas ás nenas, nenos e adolescentes do municipio.

    Durante o encontro, as diferentes áreas municipais implicadas compartiron as actuacións desenvolvidas nos últimos meses, así como os avances acadados nas diferentes medidas recollidas no plan. Unha posta en común que permite coñecer o traballo que se está a realizar desde cada departamento e reforzar a coordinación para seguir avanzando de maneira conxunta.

    A reunión tivo tamén como obxectivo recoller e compartir información, datos e evidencias sobre as actuacións realizadas, necesarios para cubrir o informe intermedio de seguimento que Nigrán debe presentar ante UNICEF España no marco do recoñecemento como Cidade Amiga da Infancia.

    Deste xeito, as diferentes áreas achegaron os datos correspondentes ás iniciativas e programas desenvolvidos, permitindo facer unha fotografía global do traballo realizado e comprobar o grao de cumprimento das accións previstas no Plan Municipal.

    A Mesa de Coordinación Interna continuará traballando no seguimento do plan e na recompilación dos datos necesarios para avaliar os avances realizados, sempre coa perspectiva de infancia como eixo fundamental e co obxectivo de seguir construíndo un Nigrán cada vez máis amigo da infancia.

NIGRÁN PON EN MARCHA, UN ANO MÁIS, OS CAMPUS CREATIVOS DE VERÁN DESEÑADOS POR ‘XERACIÓN XA!’

     As crianzas de Nigrán asumiron novamente o reto de deseñar os plans de ocio infantil nos que a creatividade fose a protagonista. Deste xeito, o noso órgano municipal de participación infantil e xuvenil autonomeado como ‘Xeración Xa!', apostou por plan que complementan aos campamentos deportivos que, tradicionalmente, xa ofrece o Concello xunto aos clubes do municipio.

O resultado foi que este ano, durante o mes de xullo e de de luns a venres gratuítamente, o Concello ofreceu cinco opcións: ‘Iniciación ao xogo de rol’ en ‘Máis que xogos’ (Centro Comercial A Ramallosa); ‘Cerámica, Xoiaría e Manualidades’, con Nerea Vila en ‘Seres Espacio Creativo’, no Centro Comercial A Ramallosa); ‘Aventura Isleña’, con Tali en La isla de Tali; ‘Debuxando o Val Miñor’, con Coral Martínez en Academia de Cómic Val Miñor; e, finalmente, ‘Customización de roupa e obxectos’ con Dani Seek na Praza da Biblioteca). 

“Desde o Concello de Nigrán estamos moi orgullosos de contar cunha mocidade comprometida e participativa que nos permite construír un municipio de verdade amigo da infancia. É a nosa obriga escoitar á infancia, eles non poden ser cidadáns de segunda polo feito de non votar”, reitera o alcalde, Juan González.

XERACIÓN XA! CONVERTEUSE EN MONITORAS E MONITORES POR UN DÍA PARA COMPARTIR SOBRE OS DEREITOS DA INFANCIA NO CAMPAMENTO URBANO.

    As nenas, nenos e adolescentes de Xeración Xa! volveron demostrar a importancia da participación. Nesta ocasión, achegáronse ao campamento urbano do Concello para converterse en monitoras e monitores por un día e pasar unha xornada moi especial coas crianzas participantes.

    Durante a visita falaron sobre os Dereitos da infancia, explicándolles por que é importante coñecelos, defendelos e facer que se cumpran no día a día. Tamén aproveitaron para falarlles de Xeración Xa! como funciona este órgano municipal de participación infantil e xuvenil e porque é tan importante que as crianzas teñan voz e poidan opinar sobre as cousas que lles afectan.

    E, como non podía ser doutra maneira, a xornada tamén tivo moito xogo, diversión e risas.

Esta actividade serviu para que as propias integrantes do grupo puidesen experimentar de primeira man o que significa acompañar a outras crianzas, pero tamén para transmitirlles unha mensaxe fundamental: as nenas, nenos e adolescentes temos dereitos a ser escoitados e a participar na vida do noso municipio.

    “Para nós é moi importante que ‘Xeración Xa!’ non sexa só un espazo no que as crianzas poidan dar a súa opinión, senón tamén unha ferramenta para compartir esa participación con outras nenas e nenos de Nigrán. Hoxe foron monitoras e monitores por un día, pero sobre todo foron referentes para outras crianzas, demostrando que a súa voz conta e que participar tamén é divertido”, destacan desde o Concello.

    Unha nova experiencia que demostra que Nigrán é un municipio no que a infancia ten voz, participa e tamén toma a palabra para falar dos seus propios dereitos. E, por suposto, sempre cun espazo reservado para xogar moito.

UXÍA FERNÁNDEZ, DE "XERACIÓN XA" DE NIGRÁN, PIDE NO CONGRESO QUE TODOS OS DEREITOS SEXAN ACCESIBLES

     Baixo o paraugas de Unicef co programa «A infancia no Congreso», oito nenos e nenas de 12 a 17 anos expuxeron no hemiciclo do Congreso dos Deputados as súas propostas e reflexións acerca de temáticas que lles afectan directamente, como saúde mental, prevención da violencia, pobreza, acción climática ou dereitos de infancia na contorna dixital.

    Entre as intervencións estivo a de Uxía, unha nena de Nigrán de 16 anos, membro do grupo de participación infantil e xuvenil Xeración Xa! Ela falou de dereitos dixitais e discapacidade na infancia. «A miña experiencia persoal ensinoume desde moi pequena o importante que é que todos os dereitos, tamén os dixitais, sexan realmente accesibles para todas as persoas», indicou. «Cando unha plataforma educativa non é accesible, cando unha aplicación non está adaptada ou cando a tecnoloxía non ten en conta as nosas necesidades, créanse barreiras, que afectan especialmente os nenos, nenas e adolescentes con discapacidade». Finalmente, concluíu remarcando que «nada sobre nós debería facerse sen nós. Unha sociedade verdadeiramente inclusiva tamén se constrúe na contorna dixital».

Moitísimas grazas Uxía por representarnos tan ben!!

 

O CONCELLO DE NIGRÁN CONMEMORA O 25-N COA LECTURA DUN MANIFESTO DA 'XERACIÓN XA!' E O PRIMEIRO CONSELLO MUNICIPAL DA MULLER

 O Concello de Nigrán culminou onte a programación especial polo 25-N, ‘Día Internacional para a erradicación da violencia contra as mulleres’, coa lectura dun manifesto esta mañá e a constitución do primeiro Consello Municipal da Muller pola tarde no Salón de Plenos.

Así, o 25 de novembro arrancou ao mediodía na Praza do Concello coa proclama dun manifesto a cargo da 'Xeración Xa!', o órgano de participación infantil e xuvenil do Concello de Nigrán, con tres voceiros que adicaron o seu discurso ás vítimas de violencia vicaria. "Queremos medrar nun mundo onde o amor non fira, onde o coidado sexa forza, onde a vida sexa segura, tamén dentro da casa", expresaron antes de finalizar co berro '"Nin unha menos!". Ao rematar, xunto aos representantes da corporación municipal, alumnado de 6º de Primaria do CEIP Humberto Juanes e do CEE Juan María gardaron un minuto de silencio por todas as vítimas de violencia de xénero.

A conmemoración polo 25-N continuou a partir das 17:00 horas no Salón de Plenos coa constitución do 'Consello Municipal da Muller', novo órgano de carácter informativo e consultivo donde participaron dous representantes de Xeración Xa, Uxía e José como voceiros.  

DIA DA INANCIA EN NIGRÁN- O CONCELLO DE NIGRÁN CELEBRA CUN PLENO INFANTIL O DÍA MUNDIAL DOS DEREITOS DO NENO E A NENA E VISITA O PARLAMENTO DE GALICIA

    

    O Concello de Nigrán celebrou o pasado 20 de novembro, o 'Día Mundial da Infancia' cunha sesión plenaria especial protagonizada polos nenos e nenas do noso municipio e cos seus dereitos dixitais como eixo temático deste ano. Así, un total de 18 alumnos procedentes de 8 centros educativos (IES Proval, IES Val Miñor, CEIP da Cruz, Carlos Casares, Humberto Juanes, CPI Arquitecto Palacios, Ángel de la Guarda e CEE Juan María) actuaron como 'concelleiros' da localidade co alcalde, Juan González, e a edil de Educación, Estela Pérez, como interlocutores por parte do goberno local.

Este foi o acto central do Concello coincidindo no día exacto da efeméride, mentres que o venres 21, unha representación de 7 membros da 'Xeración Xa!' acudiu xunto ao alcalde e a concelleira de Educación ao Parlamento de Galicia coa misión de participar nunha sesión similar con voceiros de consellos de toda a comunidade. Neste caso a voceira do noso concello foi Enma Touceda.

Este ano Unicef propuxo a todas as 'Cidades Amigas da Infancia' que para esta data os seus órganos de participación infantil reflexionasen baixo o lema 'Enciende tus derechos digitales'. Así, para esta sesión plenaria, dous voceiros por cada centro educativo expuxeron as súas inquedanzas e demandas ao respecto. Neste sentido, houbo consenso unánime entre eles en que as crianzas precisan recibir formación para poder navegar seguros por internet e tamén os seus proxenitores para entender como protexelos. Así, a súa maior preocupación centrouse na facilidade de acceso a contidos inapropiados, polo que demandaron mecanismos efectivos de control da idade e, por outra banda, tamén se amosaron moi intranquilos co engadido negativo que supoñen as redes sociais nos casos de 'bullying', polo que consideran necesaria a existencia dun educador especialista en cada centro educativo.

‘XERACIÓN XA!’ EXERCE DE ANFITRIOA DO ‘IV CONSELLO AUTONÓMICO DE CONSELLOS LOCAIS DA INFANCIA E ADOLESCENCIA’

    A ‘Xeración Xa!’ do Concello de Nigrán exerce por vez primeira de anfitrioa no ‘IV Consello Autonómico de Consellos Locais da Infancia e Adolescencia’ que se celebrou en outubro na Residencia de Tempo Libre de Patos a instancias de Unicef. 

    Así, cinco voceiros do órgano de participación infantil e xuvenil do municipio debatiron xunto a preto de 50 crianzas de toda Galicia sobre os seus dereitos dixitais, temática elixida este ano desde Unicef para este encontro bianual. Ademáis destes representantes de consellos de toda Galicia asistiron tamén mozos e mozas do Consello Autonómico de Infancia e Adolescencia (CAIA), órgano no que tamén figura Nigrán grazas a Cayetana Guede e Carmen Vázquez (IES Val Miñor).

    Durante todo o sábado e a mañá do domingo, todos xuntos traballaron na temática elixida participando en diferentes scape-rooms ao respecto (tamén gozaron de momentos de ocio e tempo libre, como o show do ilusionista Xulio Merino que se lles ofreceu desde o Concello). O último día, domingo ao mediodía, poideron presentar as súas conclusións ante o alcalde de Nigrán, representantes da Xunta e de Unicef.